बागलुङमा एकैसाथ ३० जना अन्तर्राष्ट्रिय कलाकारको वेजोड प्रस्तुती : नेपाली संस्कृतीलाई विदेशीको नमन ।

अन्तर्राष्ट्रिय कृष्णभावनामृत संघ (इस्कोन) बागलुङले  एकैसाथ १० देशका ३० जना अन्तर्राष्ट्रिय कलाकारहरु झिकाइ बाग्लुंग बजारमा  अन्तर्राष्ट्रिय स्तरको महारात्री कार्यक्रमलाइ भव्य तथा सभ्य रुपमा आयोजना गरेको छ  । महाशिवरात्रीको अवसरमा फागुन १५ गते आयोजना गरिएको महारात्री कार्यक्रममा विदेशी कलाकारहरुले विशेष सांस्कृतिक प्रस्तुती दिएका थिए  ।

विदेशी कलाकारले नेपाली झण्डा उचाली राष्ट्रिय गान सहित नेपाल राष्ट्रको सम्मान गर्दै कार्यक्रम उद्धाटन गरिएको कार्यक्रमले सहभागीहरुको मन जितेको थियो । नेपाली संस्कृति बिदेशी प्रस्तुति नारा रहेको कार्यक्रममा ५०० भन्दा बढी दर्शकले कार्यक्रम अवधिभर भाग लिएका थिए ।  वेदा नाम गरेको अन्तर्राष्ट्रिय सांस्कृतिक समुहले रामायण, भागवत, कृष्णलिला, शिवरात्री आदिमा आधारित नाटक , नृत्य तथा गितहरु प्रस्तुत गरेको हो । रसिया, युक्रेन, अमेरिका, हंगरी, पोल्याण्ड ,बंगलादेश, भारत लगायतका देशबाट आएका ३० जना कलाकारहरुको प्रस्तुतिले दर्शकको मन जितेको थियो । कार्यक्रममा चर्चित  गायक थानेश्वर गौतमले पनि हरेकृष्ण कीर्तन गाएका थिए ।
 

    कार्यक्रममा रसियन गुरु पत्री दास प्रभुले आफूहरुजस्ता विदेशीहरुले समेत हरेकृष्ण हरेराम जप गर्दै नेपाली संस्कृतीको उच्च आदार गरेको तर नेपालीहरु भने आफ्नो धर्मसंस्कृती छाड्दै पाश्चात्य संस्कृतिको अन्धानुकरण गर्दै गएको भन्दै नजिकको तीर्थ हेला गर्न नहुने धारणा राख्नुभएको थियो । 

बिरगञ्ज, चितवन, बागलुङ र काठमाडौंमा कार्यक्रम गर्न आएको वेदा नामक अन्तर्राष्ट्रिय सांस्कृतिक समुहले हालसम्म विरगञ्ज, भरतपुर र बागलुङमा आफ्नो प्रस्तुती देखाइसकेको छ । फागुन १७ गते बेलुकी ४ बजे काठमाडौंको राष्ट्रिय सभागृह र २० गते महाशिवरात्रीको दिनमा पशुपतिनाथ मन्दिर परिसरमा रहेको सुमार्गी ग्राउण्डमा पनि प्रस्तुती गर्ने आयोजक संस्था इस्कोन नेपालका केन्द्रिय उपाध्यक्ष परमेश्वर अच्युत दासले जानकारी दिएका छन् ।